இதற்கு முன்னால்,…. என் தங்கை எப்படி எங்களோடு வந்து தங்கி விட்டாள் என்ற கதையை உங்களுக்கு சொல்லியாக வேண்டும்.
என் மனைவி இறந்து ஒரு வருடம் ஆகியிருக்கும்,…திருமபவும் என் தங்கை, ஒரு பெட்டியை தூக்கிகிட்டு, கண்ணை கசக்கிக் கொண்டு வீட்டுக்கு வந்தாள்.
“இந்தத் தடவை என்னத்தைக் கேட்டு உன் புருஷன் உன்னை இங்கே துரத்தி வீட்டிருக்கான்.”
“பத்து பவுன் நகை வாங்கிட்டு வரணுமாம். இல்லைன்னா டைவோர்ஸ் பண்ணிடுவானாம். அதெல்லாம் தர முடியாது. உனக்கு பணமும், நகையும் கொடுத்து உன் வீட்ல வேலைகாரியாய் வாழறதை விட, என் வீட்ல சந்தோஷமா வாழா வெட்டியா இருந்துட்டுப் போறேன்”ன்னு சொல்லிட்டு வந்துட்டேன். அவன் டைவோர்ஸ் பண்ணினாலும் பரவாயில்லை. இனிமேல் அவன் கூட வாழப் போறதில்லைம்மா” என்று சொல்லி அழுதாள்.
“சரி,… இருந்துட்டுப் போடி. அன்ணனோட வாழ்க்கைதான் இப்படி ஆரம்பத்துலேயே அஸ்தமனம் ஆய்டுச்சேன்னு கலங்கி கவலைப் பட்டு நிக்கிறேன். அதுக்குள்ள உன் வாழ்க்கையும் இப்படி வீணாப் போகும்னு விதி இருந்தா நான் என்ன பண்ணுவேன்? நடக்கிறது நடக்கட்டும். பட்ட காலிலே படும். கெட்ட குடியே கெடும்கிறது இதுதானோ? அனுபவிக்க வேண்டியதை அனுபவிச்சுத் தானே ஆகணும். விலகி ஓடுனா, விட்டுடுமா என்ன?”
ஒரு வாரத்தில் டைவோர்ஸ் நோட்டீஸ் வந்தது.
“என்னடி? டைவோர்ஸ் நோட்டீஸே விட்டுட்டான் உன் புருஷன். இதுக்கப்புறம் என்ன செய்யிறதா உத்தேசம்? அண்ணனும், உன் வாழ்க்கை நல்லா இருக்கணும்னு உனக்கு கொடுத்து கொடுத்து ஓஞ்சு போய்ட்டான். இனிமேலும் உனக்காக கொடுத்து உன் வாழ்க்கையை ஒட்ட வைக்க முடியாதுன்றது எனக்கு புரிஞ்சு போச்சு. இது வரைக்கும் கொடுத்தது போதும், இனி மேலும் கொடுத்திட்டிருக்க முடியாது. அவன் வாழ்க்கைக்குன்னும் கொஞ்சம் சேத்து வைக்கணும். வேணும்னா ஊர்ல நாலு பேரை வச்சு, பஞ்சாயத்து பேசி பாக்கச் சொல்லவா?”
“இனி எத்தனை நாளுக்குதான் எனக்காக கஷ்டப்படுவீங்க? நீங்க இங்க எனக்காக கஷ்டப்பட்டு பணம் கொடுத்து அனுப்பிச்சாலும், நான் அங்க நிம்மதியா இல்ல. அவங்களுக்கு பணமும், நகையும்தான் குறியா இருக்கு. என்னைப் பத்தியும், என்னோட வாழ்க்கை பத்தியும், என்னோட சந்தொஷத்தைப் பத்தியும் அவங்க கவலைப் படறதா தெரியலை.”
“ நான் வேணும்னா வந்து பேசிப் பாக்கவா?”
“அதெல்லாம் ஒன்னும் வேணாம்மா. விதிப்படி நடக்கட்டும். நான் டைவோர்ஸ் நோட்டீஸ்ல கையெழுத்து போடறதா முடிவு பண்ணிட்டேன். நீங்க குடிக்கிற கஞ்சியோ கூழோ, அதையே நானும் குடிச்சிட்டு இங்கேயே இருந்திட்றேன். இதை நீங்க விரும்பலைன்னா நான் எங்காவது போய்ட்றேன். ஆனா, இனிமேலும் அந்த ஆள் கூட வாழ எனக்கு விருப்பமில்லை.”
“ நானும், உன் அண்ணனும் உயிரோட இருக்கிறப்ப, நீ எதுக்காகடி அனாதை மாதிரி எங்கேயாவது போகணும்? எங்களோடயே இருந்துடு. நடக்கிறது நடக்கட்டும்”
Next please 9